සෞඛ්‍ය සම්පන්න ආහාර වේලක් ලබාගැනීමට අවශ්‍ය ආහාර, ආහාර කාණ්ඩ හයකට බෙදා ඇත. එම නිසා සෑම ආහාර කාණ්ඩයකින්ම ආහාර වර්ග දිනපතා කෑමට ගැනීමෙන් ශරීරයට අවශ්‍ය සියලූම පෝෂ්‍ය පදාර්ථ ලබාගත හැක. කිසියම් ආහාර කාණ්ඩයකට අයත් ආහාර නොගැනීමෙන් හෝ සමහර කාණ්ඩවල ආහාර පමණක් වැඩිපුර ගැනීමෙන් ඔබට අවශ්‍ය සමහර පෝෂ්‍ය පදාර්ථ අඩුවීම හෝ වැඩිවීම සිදුවේ.
 
 සෞඛ්‍ය සම්පන්න ආහාර වේලක් යනු කුමක්ද?
 
 ආහාර මගින් ශරීරයේ ක‍්‍රියාකාරීත්වයටත්, නිසි මානසික හා කායික වර්ධනයටත් අවශ්‍ය පෝෂ්‍ය පදාර්ථ ලැබේ. සෑම ආහාරයකම පෝෂ්‍ය පදාර්ථ කිහිපයක් ඇති නමුත් එක් ආහාරයක සෑම පෝෂ්‍ය පදාර්ථයක්ම අඩංගු වන්නේ නැත. එබැවින් දිනපතා විවිධ ආහාර ගැනීමෙන් ශරීරයට අත්‍යවශ්‍ය සෑම පෝෂ්‍ය පදාර්ථයක්ම ලබාගත හැක. මෙලෙස සෑම පෝෂ්‍ය පදාර්ථයක්ම අවශ්‍ය ප‍්‍රමාණවලින් අඩංගු ආහාර වේලක්, සෞඛ්‍ය සම්පන්න ආහාර වේලක් ලෙස හඳුන්වනු ලබයි.
 
 ආහාර කාණ්ඩ හයටම අයත් ආහාර ගත යුත්තේ ඇයි?
 
 සෞඛ්‍ය සම්පන්න ආහාර වේලක් ලබාගැනීමට අවශ්‍ය ආහාර, ආහාර කාණ්ඩ හයකට බෙදා ඇත. එම නිසා සෑම ආහාර කාණ්ඩයකින්ම ආහාර වර්ග දිනපතා කෑමට ගැනීමෙන් ශරීරයට අවශ්‍ය සියලූම පෝෂ්‍ය පදාර්ථ ලබාගත හැක. කිසියම් ආහාර කාණ්ඩයකට අයත් ආහාර නොගැනීමෙන් හෝ සමහර කාණ්ඩවල ආහාර පමණක් වැඩිපුර ගැනීමෙන් ඔබට අවශ්‍ය සමහර පෝෂ්‍ය පදාර්ථ අඩුවීම හෝ වැඩිවීම සිදුවේ. එබැවින් ආහාරවල විවිධත්වයක් ඇතිකර ගැනීම හා නිර්දේශිත ප‍්‍රමාණයන් ගැනීම වැදගත්ය.
 
 ආහාර කාණ්ඩ හය සහ එහි ප‍්‍රධාන කාර්යය
 
 එක් එක් ආහාර කාණ්ඩ, එම කාණ්ඩවලට අයත් ආහාර සහ එම ආහාරවලින් ඉටුවන ප‍්‍රධාන කාර්යය පහත දැක්වේ.
 
 1 කාණ්ඩය
 
 බත්, කුරක්කන්, මෙනේරි, බඩඉරි`ගු ඇතුළු ධාන්‍ය, පාන්, පාන්පිටි සහ සහල් පිටි අඩංගු ආහාර සහ අල, බතල.
 
 ⋆ දෛනික ක‍්‍රියාවන්ට අවශ්‍ය ශක්තිය ලබාදෙයි.
 
 2 කාණ්ඩය
 
 එළවළු සහ පලාවර්ග
 
 ⋆ විටමින් හා ඛනිජ ලවන ලබාදෙයි.
 
 ⋆ ලෙඩ රෝගවලින් ආරක්‍ෂා කරයි.
 
 3 කාණ්ඩය
 
 පලතුරු
 
 ⋆ විටමින් හා ඛනිජ ලවණ ලබාදෙයි.
 
 ⋆ ලෙඩරෝග වලින් ආරක්‍ෂා කරයි.
 
 4 කාණ්ඩය
 
 මාළු, බිත්තර, පියලි හා ඇට වර්ග, රනිල භෝග, මස්, කරවල
 
 ⋆ ප්‍රෝටීන ලබාදෙයි.
 
 ⋆ ශරීරය වර්ධනය සහ පවත්වා ගැනීමට අවශ්‍ය වේ.
 
 5 කාණ්ඩය
 
 කිරි හා කිරි ආහාර
 
 ⋆ ප්‍රෝටීන ලබාදෙයි.
 
 ⋆ කැල්සියම් වැනි අත්‍යවශ්‍ය ඛනිජ ලවන මගින් අස්ථි වර්ධනය කර පවත්වා ගැනීමට උපකාරී වේ.
 
 6 කාණ්ඩය
 
 ⋆ කජු, රටකජු, තල, පොල්, තල තෙල්, පොල් තෙල් ඇතුළු ආහාරයට ගන්නා විවිධ තෙල් වර්ග අඩංගු ආහාර, මාගරින්, බටර්.
 
 ⋆ ශරීරයට අවශ්‍ය ශක්තිය ලබාදෙයි.
 
 ⋆ ශරීරය පවත්වා ගැනීමට හා පරිවෘත්තීය ක‍්‍රියා මනාව සිදුකිරීමට අවශ්‍ය වේ. සෞඛ්‍ය අමාත්‍යංශයේ පෝෂණ අංශය